الشاعر الراحل غازي الحداد

عاشرنا صباحه غير

ايغرد بالنحيب الطير

ولا ظنتي فاله خير

شينه هالصباحيه

اشوف ابطلعته حمره

علينه الدنيا متغيره

لـنهاره ولا عصره

ماهو مثل يوميه

الناس امجمعه ابهمها

أظن حسين لايمها

ولزمها ابـمآتمها

لا روحه ولا جيه

صباح العاشر ابعاشور

ماترهم صباح النور

لطم وعزه ابوسط الدور

والأفراح شاميه

ابيومك ياصباح انحوس

انحور وما عليها روس

وخيل اعله الشهيد اتدوس

والمخيم احسينيه

تگدر ماتهل العين

من تسمع ابسهم حسين

هذا اللي سگاه البين

من گليه نبع ريه

سطا به ووسده الغبره

وسوه ابمهجته حفره

تجره وطلع من ظهره

ابدمه وشمت راميه

رماه من المهر دامي

وفتت گلبه الضامي

تعفر والترب حامي

ويفوح ابوهج لاضيه

عليه المهر ظل ايحوم

ويشم گلبه ايريده ايگوم

يمرغ ناصيه بدموم

من نزفات راعيه

ابد مايندمل جرحه

فجعنه ابـخطفته ولمحه

يريته ماطلع صبحه

ولا حد جاب طاريه

زحف وايده على افاده

يلمله من الثره اوساده

وهج الفرس بطراده

وسرجه اعليه ملويه

امطير واجنح الرگضة

يشد ابطلگته بعضه

شرگ بلجامه وعضه

وصهل صهلات رعديه

يصيح من الظليمه آه

وعلى المظلوم واويلاه

وبعينه سچيب ادماه

ويشكي من بني أميه

لفه زينب وسط الخدور

عليه ادموم تسطع نور

وگلها صوبچ عاشور

وانتي اليوم مسبيه

تگله وين خيالك

أشوفك منشده بالك

خالي وتفجع احوالك

ليكون انذبح خيه

گلها ما خطاچ الشر

صابه سهم المگدر

على ظهري ومني خر

وما ينـعرف تاليه

عفته گصت اجراحات

وما بطل من الونات

حي من العطش لو مات

مفطور ابصواديه

يزينب طيحته ابوجهه

ودم الحجر بالجبهه

وجـروحه الضمه شبهه

اودمه من الشمس فيه